Як паведамляе Радыё Рацыя, актора доўга правяралі на пашпартным кантролі і потым пакінулі ў пакоі для перамешчаных асобаў.
Аляксандр Ждановіч:Як бы дадатковы дагляд пашпарта быў. Пасьля завялі на размову з афіцэрам. Я спытаўся – гэта допыт? Адказалі, што не. Спыталі, куды едзеце, кантакты, да каго едзеце, навошта? Я адказаў, куды я еду, да каго. Мне сказалі пачакаць. Дзесьці паўгадзіны чакаў, а пасьля паказалі мне паперку афіцыйную, што мне адмоўлена ў наведваньні Грузіі.
Раніцай а шостай Ждановіча пасадзяць на самалёт у Варшаву.
У дакуменце, які выдалі Ждановічу сказана, што ён не мае права знаходзіцца ў Грузіі, сярод падстаў адзначана «іншыя прычыны».
Аляксандр Ждановіч павінен быў выступіць перад беларусамі Батумі, для якіх ён «вёз новае прадстаўленьне і кніжкі», але ўлады Грузіі вырашылі інакш.
Актор Аляксандар Ждановіч, найбольш вядомы як «Маляваныч» зь дзіцячай праграмы «Калыханка», вымушана пакінуў Беларусь у лютым 2022 года.
У апошнія тыдні перад эміграцыяй на яго ціснулі, акторам цікавіліся спэцслужбы, выклікалі на допыт у Дэпартамэнт фінансавых расьсьледаваньняў.
Да таго актора звольнілі з тэатру імя Горкага і асудзілі на 9 дзён арышту за ўдзел у адным з пратэставых маршаў. Увосень 2020-га Аляксандар неаднаразова заяўляў, што выбары прэзыдэнта ў Беларусі сфальсыфікавалі, ён актыўна пісаў пра гэта ў сацыяльных сетках.
Форум