Раней лічылася, што на тэрыторыі лягера (урочышчы «Благоўшчына», «Шашкоўка», паблізу вёскі Малы Трасьцянец) пахаваныя 206,5 тыс. чалавек. Такім чынам, Генпракуратура павялічыла колькасьць ахвяр больш як у 2,6 раза.
На патрабаваньне Генпракуратуры органы выканаўчай улады склалі «адзіны пашпарт пахаваньня (уліковы нумар 5838), зьвесткі пра якое ўнесеныя Міністэрствам абароны ў аўтаматызаваны банк даных „Кніга Памяці Рэспублікі Беларусь“, што мае адкрыты доступ у сетцы Інтэрнэт».
«Акрамя таго, у мэтах захаваньня гістарычнай памяці Генэральнай пракуратурай запатрабавана забясьпечыць давядзеньне да грамадзкасьці, у тым ліку моладзі, поўнай і дакладнай інфармацыі пра рэальныя маштабы трагедыі і наступствы генацыду беларускага народу», — гаворыцца ў паведамленьні.
У Беларусі ў 2021 годзе быў прыняты закон «Аб генацыдзе беларускага народу». Пры гэтым пад беларускім народам «для мэтаў гэтага закону разумеюцца савецкія грамадзяне, якія пражывалі на тэрыторыі Беларускай Савецкай Сацыялістычнай Рэспублікі ў пэрыяд Вялікай Айчыннай вайны і (або) пасьляваенны пэрыяд (да 31 сьнежня 1951 году)», — гаворыцца ў законе.
Фрагмэнт мэмарыялу ў Трасьцянцы.
За «адмаўленьне генацыду беларускага народу» арт. 1302 КК прадугледжвае адказнасьць у выглядзе 5 гадоў зьняволеньня, за паўторнае парушэньне закону — ад 3 да 10 гадоў пазбаўленьня волі.
17 ліпеня 2023 году Аляксандар Лукашэнка падпісаў закон «Аб зьмене Крымінальна-працэсуальнага кодэксу», які дазваляе перасьледаваць памерлых у крымінальным парадку. З таго часу ў Беларусі было праведзена некалькі судовых працэсаў у дачыненьні да даўно памерлых ваенных злачынцаў.
- Незалежныя гісторыкі і экспэрты лічаць, што ўлады выкарыстоўваюць гэтую тэму для дыскрэдытацыі апанэнтаў. Пра гэта, у прыватнасьці, сьведчыць зьмест кнігі «Генацыд беларускага народу», якая выйшла пад рэдакцыяй генэральнага пракурора Андрэя Шведа. У ёй сьцьвярджаецца, што масавыя пратэсты супраць фальсыфікацыі вынікаў прэзыдэнцкіх выбараў 2020 году зьяўляюцца спробай дзяржаўнага перавароту з выкарыстаньнем нацысцкай ідэалёгіі. Акрамя таго, да генацыду фактычна прыраўнаны антысавецкі супраціў у першыя пасьляваенныя гады.