Ужо сёньня: 525 гадоў зьяўленьня абраза Маці Божай Менскай, 75 гадоў Пятру Краўчанку, дзень памяці Якуба Коласа

Даты дня

13 жніўня 1500 году Менскі абраз Багародзіцы зьявіўся на Сьвіслачы каля замка.

13 жніўня 1950 году нарадзіўся Пятро Краўчанка, беларускі палітык, дыплямат, гісторык і калекцыянэр, першы міністар замежных справаў незалежнай Беларусі. Шмат спрычніўся да ўшанааньня памяці Францішка Скарыны за мяжой.

Пятро Краўчанка

13 жніўня 1956 году памёр народны паэт Беларусі Якуб Колас, грамадзкі дзяяч, перакладчык, пэдагог. Колас лічыцца адным з заснавальнікаў сучаснай беларускай літаратуры.

1956. Пахаваньне Якуба Коласа

Таксама ў гэты дзень

1654 — пасьля працяглай аблогі горад Гомель захапілі казакі Івана Залатарэнкі. Залатарэнка прывёў у Беларусь сваё 20-тысячнае войска пры падтрымцы маскоўскага цара.

1920 — падчас польска-савецкай вайны пачалася Варшаўская бітва, у якой польскія сілы пад камандаваньнем Юзэфа Пілсудзкага затрымалі бальшавікоў каля Варшавы, а потым разьбілі іх і прымусілі да адступленьня. Шэраг польскіх перамогаў, якія адбыліся пасьля Варшаўскай бітвы, прывялі да мірнай польска-савецкай дамовы 1921 году ў Рызе. У выніку гэтай дамовы Заходняя Беларусь апынулася ў межах Польшчы.

1942 — зьнішчанае Мірскае гета — забітыя больш за 600 апошніх габрэяў.

2020 — паўтысячы зьняволеных выйшлі на мітынг пратэсту ў Бабруйскай калёніі.

У гэты дзень нарадзіліся

1750 — Ксаверы Карніцкі, падарожнік, у 1774–1789 жыў у Чылі. Першы вядомы ліцьвін, які ў 1790 годзе наведаў Аўстралію.

1860 — Мацьвей Любаўскі, расейскі гісторык, які вывучаў Вялікае Княства Літоўскае і Рускае.

1883 — Сьцяпан Мельнiк, вучоны батанік і лесавод, ахвяра сталінізму.

1899 — Альфрэд Гічкок, клясык амэрыканскіх фільмаў жаху.

1913 — Анатоль Багатыроў, беларускі кампазытар, адзін з заснавальнікаў беларускай опэры. Сярод іншага, ён напісаў музыку да опэры «Ў пушчах Палесься» на аснове аповесьці «Дрыгва» Якуба Коласа (пастаноўка 1939 году).

Анатоль Багатыроў

1923 — Самсон Пярловіч, беларускі паэт, удзельнік беларускага наваградзкага патрыятычнага падпольля, вязень ГУЛАГу.

1926 — Фідэль Кастра, камуністычны дыктатар Кубы. Ён кіраваў краінай з 1959 па 2006 год, калі перастаў зьяўляцца на публіцы і перадаў свае прэзыдэнцкія паўнамоцтвы малодшаму брату Раулю.

Фідэль Кастра ў Маскве ў траўні 1963 году, разам з кіраўніком КПСС Мікітам Хрушчовым

1950 — Пятро Краўчанка, беларускі палітык, дыплямат, гісторык і калекцыянэр, першы міністар замежных справаў незалежнай Беларусі.

Пятро Краўчанка

1950 — Ларыса Фінкельштэйн, мастацтвазнаўца, арт-крытык, галерыст, куратар выставаў сучаснага мастацтва, калекцыянэр.

1959 — Яўген Колчаў, скульптар і фатограф.

У памяці

1775 — Фрэдэрык Чартарыйскі, канцлер вялікі літоўскі.

1946 — Гербэрт Уэлс, ангельскі пісьменьнік.

1995 – Аляксей Мельнікаў, беларускі гісторык і літаратар. Яго знайшлі забітым ва ўласнай кватэры.