Як адзначаецца ў паведамленьні, пастаянным прадстаўніком у пытаньнях нацыянальнага адраджэньня стаў кандыдат філязофскіх навук, гасьцявы прафэсар Інстытуту філязофіі і сацыялёгіі Польскай акадэміі навук Павал Баркоўскі, а ягонымі намесьнікамі сталі Ірэна Кацяловіч і Андрэй Лаўрухін.
Ірэна Кацяловіч — кіраўніца культурных праектаў і журналістка з больш як дзесяцігадовым досьведам у мэдыя і кінаіндустрыі, сузаснавальніца Прэміі беларускіх кінакрытыкаў Red Heather і Беларускай незалежнай кінаакадэміі, сябра Міжнароднай фэдэрацыі кінапрэсы (FIPRESCI) і журы міжнародных фэстываляў. Працавала ў Deutsche Welle і «Белсаце».
Андрэй Лаўрухін — дасьледчык і экспэрт у сфэры адукацыйнай палітыкі, сацыялёгіі і філязофіі з больш як 25-гадовым досьведам выкладаньня і кіраваньня акадэмічнымі праграмамі ў Беларусі, Літве і Расе, дырэктар дасьледаваньняў Інстытуту разьвіцьця і сацыяльнага рынку ў Беларусі і Ўсходняй Эўропе, колішні дацэнт Эўрапейскага гуманітарнага ўнівэрсытэту і Вышэйшай школы эканомікі.
На пасаду прадстаўніцы па эканоміцы і фінансах прызначылі Алісу Рыжычэнка. Сярод яе абавязкаў — распрацоўка эканамічнай стратэгіі для пераходнага пэрыяду, супрацоўніцтва зь міжнароднымі інстытутамі, прыцягненьне інвэстыцый і фінансаваньня, падрыхтоўка праграмных дакумэнтаў і канцэпцый разам з экспэртнай супольнасьцю.
Аліса Рыжычэнка — магістар эканомікі (БДЭУ) і магістар палітычных навук (Венскі ўнівэрсытэт), спэцыялізуецца на пытаньнях Эўразьвязу, міжнароднай палітыкі і разьвіцьця. Мае досьвед працы ў фондах «Краіна для жыцьця», «Дыхай вольна».
Кіраўніцай Місіі дэмакратычных сіл Беларусі ў Кіеве прызначылі Сьвятлана Шаціліну. Яна будзе прадстаўляць Аб’яднаны пераходны кабінэт і Офіс Сьвятланы Ціханоўскай ва Ўкраіне. Мае досьвед супрацоўніцтва зь дзяржаўнымі структурамі і дэпутатамі Вярхоўнай Рады, удзельнічала ў акцыях і гуманітарных праектах, каардынавала мэдычныя місіі ў дэакупаваныя рэгіёны Ўкраіны, а апошнія гады дапамагала ў працы Місіі ў пытаньнях падтрымкі беларусаў.
ГЛЯДЗІЦЕ ТАКСАМА: Камітэт дзяржаўнай бясьпекі Беларусі абнавіў «сьпіс тэрарыстаў» — уключылі блогера і Аб’яднаны пераходны кабінэтШто такое Аб’яднаны пераходны кабінэт Беларусі
На канфэрэнцыі «Новая Беларусь» у Вільні 9–10 жніўня 2022 году Сьвятлана Ціханоўская заявіла аб стварэньні Аб'яднанага пераходнага кабінэту, які будзе працаваць на галоўныя мэты:
- Абараняць незалежнасьць і сувэрэнітэт Рэспублікі Беларусь, прадстаўляць нацыянальныя інтарэсы Беларусі. Ажыцьцявіць фактычную дэакупацыю Беларусі.
- Аднавіць канстытуцыйную законнасьць і правапарадак.
- Распрацаваць і рэалізаваць меры па спыненьні незаконнага ўтрыманьня ўлады, забясьпечыць транзыт улады ад дыктатуры да дэмакратыі, стварыць умовы для правядзеньня сумленных і свабодных выбараў.
- Распрацоўваць і выконваць рашэньні, неабходныя для дасягненьня дэмакратычных перамен у Беларусі.
- І ў выніку гэтага павінны быць вызваленыя ўсе палітвязьні.
У першым складзе сярод іншых працавалі:
- Павал Латушка — прадстаўнік Кабінэту па транзыце ўлады;
- Аляксандар Азараў — па аднаўленьні правапарадку;
- Валер Кавалеўскі — па замежных справах;
- Валер Сахашчык — па абароне і нацыянальнай бясьпецы;
- Вольга Гарбунова — прадстаўніца ў сацыяльных пытаньнях;
- Аліна Коўшык — прадстаўніца па нацыянальным адраджэньні.
Тады заявілі аб пачатку распрацоўкі пляну «Перамога», намерах дабівацца безумоўнага вываду Ўзброеных сіл Расейскай Фэдэрацыі з тэрыторыі Беларусі.
Пасьля стварэньня Аб’яднаны пераходны кабінэт заснаваў Місію дэмакратычнай Беларусі ў Брусэлі і накіраваў свайго прадстаўніка ў Кіеў.